英國租樓貼士 -點樣揀治安好既屋

今日講下大家無論租屋買樓最關注既問題-治安。治安差間屋幾平幾靚都假，日日提心吊膽，出左街又驚間屋被人爆竊，行街又驚被人打劫，所以決定租屋買樓前一定要睇清楚間屋附近治安好唔好。當然，冇人可以好肯定咁答你間屋附近治安一定好，就算本地人住左幾十年英國都一樣要問人及要睇客觀數據去分析，目的就係盡量避免治安差既地方。所以，小弟今次盡量分享一下經驗，以大區小街鄰居三個層面去協助大家係大曼徹斯特揀到治安比較好既樓去住。

大區

大曼徹斯特分十個大區，除左曼徹斯特市中心外，亦包括周邊的Salford、Trafford、Stockport、Tameside、Bolton、Bury、Oldham、Rochdale及Wigan。其實網上已經有好多每區分析(可參考以下星島日報分析，有參考性！ link係下面)，呢度唔會浪費大家時間再續個講，但有一個大方向要記住，首選大曼區南部(如 Stockport /Trafford) ，然後西部(如Salford) 及北部(Bolton/Bury/Rochdale) ，最後東部(如 Oldham/Rochdale) 。點解南部最好，因為比較多好學校，平均教育水平高，有火車 Metrolink，近曼城機場及往倫敦高速公路，所以比較多本地中產、名人、專業人士及富豪尤其球星住係南部。以英國足球明星為例，好多都住係南部，尤其金三角(Golden Triangle)即Alderley Edge, Prestbury及Wilmslow，俗稱Footballer Belt ，以前 C朗(Cristiano Ronaldo)就曾經住係 Stockport既Woodford，碧咸(David Beckham)就住係 Alderley Edge等。而家曼城新星Phil Foden就住Bramhall，Raheem Sterling更係Reddish買左6幢屋放租，個個爭住租。其他曼城球員如John Stones、 Kyle Walker，同曼聯球員如Luke Shaw、Harry Maguire 及 Marcus Rashford唔係住係Trafford(Hales/Bowdon) 就住係金三角。其他大區唔係話治安好差，只係相對上冇南部咁好。每個地區都有治安差少少既小區街道，南部都會有。記住只係相對上比較好治安。如果有人話你知 Sale冇爆竊就肯定呃你。

星島日報: 曼徹斯特熱門地區全攻略 樓價租金治安大比拼 – 星島虎報海外地產 (singtaoopo.com)

小區街道

第二個層次睇小區街道。第一，要盡量避免揀太接近火車站或商店街，因為肯定多閒雜人出入，罪案率係呢D地方通常係最高。第二，唔好揀有太多 Social或Council house既街(絕對唔係歧視弱勢社群人士)。大家都明白呢啲房屋屬於社會福利型房屋，租金只係市場一半甚至乎三分之一，主要係俾低收入甚至乎無收入人士、單親家庭、殘疾人士或無家可歸等有困難人士入住，周圍環境一般都比較混亂污糟及治安差少少，當然唔可以一概而論，有D都好企理乾淨，但一般物業投資者都會避開，以免影響物業投資價值。第三，盡量唔好揀間屋係連接公園，因為公園屬於公眾地方，任何人都可以進入，容易招惹賊人，而且英國有好多流浪家庭(Gypsies and Travellers) 聯群結隊揸住架旅行車(Caravan) 週圍去，佢地多數泊係公園住一排(短則一個月長則一年)，由於冇工作做，好多都會去附近超市房屋偷竊，令到附近罪案大增。另外，間屋既花園唔好貼住後巷，同樣道理，因為任何人都可以經後巷爬入花園再入屋，所以可免則免。貼住鄰居花園最好。最後，多D做資料搜集，用streetcheck 睇下係條街既罪案率、職位、職業種類、年齡、家庭人數及種族等資料，選擇適合自己要求既街道。不過，要留意曼城既係2019年7月之後既Crime Rate有部份因電腦系統問題而無左，所以最好參考2019年7月之前既數字比較真實。

Streetcheck : https://www.streetcheck.co.uk/