根據最新 Speedtest Global Index 於2022年11月做的固網寬頻平均速度統計，全球最快竟然係智利(216MB)，香港排第 5名(194MB)，英國排55名(73MB)。睇速度英國唔係好差，但事實係英國不同街道，網速會有好大分別。問題在於個條街有冇鋪新線或光纖線。可能有人會話冇光纖咪用無線上網囉，咁你就要先肯定你個區無線電話網絡覆蓋得好好先好買 plan。

記得初初來到時住既街道都算近市中心，但寬頻速度最高得 15MB(SKY) ，仲有時有時冇，當時小朋友要zoom上堂都有問題。尤其大雨更加斷網。一個月斷線一兩次等閒事，有次我見到個維修員係外面整緊就走去問佢點解成日斷線，佢話我呢條街D電話線好舊，個總駁口(係地底)一浸就有機會斷線，咁我問點解唔鋪光纖，佢話公司覺得要掘地鋪成本太貴，加上條街需求唔太多，所以冇計劃重鋪。咁我唯有即刻買張無限上網咭(Vodafone) 插WIFI蛋做後備，點知下下要攞上一樓仲要放係窗簾架上要收得好D！我並非說英國不是，只係說事實。所以揾屋時一定要睇下有冇光纖或者睇下平均上網速度先好租，否則睇睇下大結局停左就無謂啦！